嬰仔閣確診.病毒量顛倒懸 醫:抗體無才調擋變種

這个1歲的嬰仔佇5月捌確診過，最近因為發燒，篩檢了後確定第二擺確診，醫生發現CT值竟然比進前較低，煩惱敢是嬰仔感染新冠病毒了後，產生抗體的效果較䆀，提醒家長愛注意。
新竹台大分院小兒感染科醫師 楊德亮表示：「感染過Omicron了後，並無代表就袂閣再穢著，會因為無仝款的亞型有免疫逃脫的機制，造成身軀頂產生的抗體無法度抵抗新的亞型病毒，造成第二擺的感染。」
病院講這个嬰仔有先天心臟病的病史，算重症高風險的族群，第二擺確診了後，目前當咧兒童專責病房治療。
新竹台大分院小兒科主治醫師 林函怡表示：「尤其本身是有心臟病史，像神經發展有問題的囡仔，抑是體重較重的囡仔確診，愛注意重症的發生。」
中央疫情指揮中心是表示，新竹這个例算是較特殊的个案，對國外兒童再一次感染的研究來看，重症參死亡攏比頭一擺感染較低，家長毋免傷過煩惱。