嘉義長庚研發漉喙藥水 阻擋病毒佇喙空傳播

國內新冠肺炎的疫情夯起來,嘉義長庚病院中醫科的研究團隊,研究出一種漉喙的藥水,會當降低病毒透過喙空傳染的機率,提著國家新創獎的認證。

共藥水倒佇杯仔內底漉喙,嘉義長庚病院中醫研究團隊,利用中藥成份研究出一種漉喙的藥水,會當降低喙空佮新冠肺炎病毒的結合。

嘉義長庚醫院中醫科醫師 吳清源:「這个淨口液的成份,上主要是用紅茶來做基底,加入一寡仔中藥,用特殊的製程共伊製作萃取出來。」

醫護人員:「無啥物刺激的感覺,就是有一種茶的氣味,閣有一寡仔甘甜甘甜的回甘味。」

研究團隊指出,新冠病毒會利用表面的棘蛋白來生湠,喙空內底的黏膜,就有誠濟棘蛋白的接受體,長庚研發出這種漉喙藥水,欲來減少喙空內棘蛋白接受體的表現,阻擋病毒對喙空傳播。

嘉義長庚醫院中醫科醫師 吳清源:「因為阮病院是一个新冠病毒急重症收治的病院,需要照顧誠濟急重症的感染者。阮真濟醫護人員佇使用這个物件了後,目前攏猶未有確診的情況。」

這个漉喙藥水佇2021年底得到第十八屆國家新創獎的肯定。毋過長庚研究團隊強調,病毒除了對喙以外,目睭、鼻空嘛有可能會受著感染,所以除了正確的防疫習慣,民眾猶是愛趕緊完成疫苗的注射。

九合一選戰解析

相關新聞