軍公教薪水起4% 國公營單位勞工也呼籲加薪

今年軍公教人員的薪水就欲起4%,毋過有工會團體認為,真濟國營事業煞攏無綴咧調整,致使民間企業這爿勞工的薪水,嘛攏無變動,呼籲國營企業也應該和軍公教仝款,薪水起4%。

「經濟成長削削叫,勞工散甲嘛嘛吼。」

今年軍公教人員調薪起四葩,等正月預算審議通過了後,就會實施。毋過工會團體指出,真濟國營企業調薪猶閣佇咧觀望,致使民間企業嘛無綴咧行。初六各地頭的產業總工會、佇行政院門口召開記者會,呼籲中央應該核定調薪機制達到四葩,嘛要求基本工資愛起到三萬。

宜蘭縣產業總工會理事長,胡勝己表示:「舊年咱經濟成長嘛達到6.09%,今年有望按照這个標準咧行,規个社會的通貨膨脹遐爾嚴重,外口所有物件攏咧起價,只有咱勞工佮國營事業猶未調整,先共咱的國營事業,調整到佮軍公教仝款4%,來帶動民間企業。」

嘉義市產業總工會理事長,王裕凱表示:「政府嘛講咱這馬少子化,結果你起薪無三萬,無三萬我按怎晟家。」

王裕凱講,伊嘛是佇國營企業食頭路,是做阿里山森林鐵路的維護佮保養,這份工課已經做7年矣,薪水只有2萬9千箍,最近的新進人員,起薪嘛才2萬6爾,實在是傷過低。針對遮的訴求,行政院嘛出面接下訴求、提出回應。

行政院經濟能源農業處副處長 林煌喬表示:「中央政府總預算通過了後,人事總處就會行文予經濟部,講公務人員欲調整4%矣,收著公文就會行文予國營事業,請𪜶盡量比照辦理。」

行政院表示,會共整理意見閣來討論。估計佇3月份就會有國營事業調薪的消息。針對民營事業調薪的部份,𪜶干焦表達講看法是樂觀的。

相關新聞

專題|全台敬老金大調查