"地景的刺點"出版 空翕相片見證臺灣地景發展

相片內底用刺點箍起來抑是蠟筆畫的痕跡，其實是專家用來判讀台灣60冬前農林地區發展的紀錄，由農復會、美軍等單位佇1947年到70年代所翕的相片，本底攏交予林務局農林航空測量所收藏，這改特別請地景研究者也是文化大學中文系兼任教師的黃同弘，共出版成冊，予外界也通看著過去的台灣。

作者黃同弘講，「（這本冊）解說每一个判斷痕跡，伊的一个作業，背後到底代表啥物款的一个規範。臺灣這个狀態參60冬前，有足大的一个差距。」

譬如講，佇歷史地景頂懸的聚落，原底是啥物狀態、作者就佇圖面下跤說明，予相片加添閱讀佮教育的可能性。林務局表示，佇這批珍貴的相片內底，呈現過去對空中翕相、觀察林地、溪流、海岸的變化，提供大眾了解環境的變遷、認識早期的台灣。

中研院人社中心研究副技師廖泫銘表示，「這个視野展開了後，我相信有真濟社會大眾，開始會期待，我按怎去運用遮的材料，不只佇研究、教學，甚至佇真濟藝術的創作。」

這批相片的數量超過5萬6千張，林務局委託中研院協助保存，這馬也趕緊欲共數位化，希望趕佇年底通全部囥佇網路，予大眾通透過畫面知影過去台灣農林發展的歷史。