緬甸政變欲半冬 國際特赦組織籲東協實施制裁

今年2月緬甸政變,爆發動亂,到今已經欲滿半冬,國際特赦組織、台灣分會,今仔日佮其他分會,網路連線,要求東南亞國家協會,愛採取行動,禁止武器運輸。立委洪申翰嘛希望加強監控、台灣的公股銀行,佇緬甸敢有特殊金錢流動。

緬甸自二月發生軍事政變,軍方用武器鎮壓,造成欲千人死亡,有六千七百外人予軍方掠走。佇政變欲滿半冬,也是緬甸加入東協24週年這工,國際特赦組織佇線頂串聯台灣參東協各國的分會,呼籲東協國家愛出面採取行動。

國際特赦組織馬來西亞分會秘書長 katrina Maliamauv:「馬來西亞是東協創始成員,咱政府有責任佇危機發生的時,親像緬甸軍事政變佮暴力鎮壓,展現出領導的能力。」

國際特赦組織馬來西亞分會表示,進前東協達成停止暴力、人道協助等5項決議,已經滿三個月,各國應該具體聲援,與會的台灣立委也表示,立法院佇四月通過緬甸決議文,政府就愛有作為,也要求愛阻止金流流向緬甸。

民進黨立委洪申翰講,「企業佮台商的金流,我希望莫成做緬甸軍方對外金流的管道,金管單位、外交單位也會繼續監督這件代誌。」

金管會調查,佇緬甸的公股銀行目前並無發見有特殊金流,其他國營企業也無佇緬甸投資,會閣密切注意日後的審查。另外范雲也表示,目前當咧研議台灣版本的馬格尼茨基人權問責法,預計後一个會期會送立法院,連結國際制裁威權獨裁者。

全台敬老金大調查

相關新聞