嘉義觀光商展全歇市 擔頭家盡望7/12閣營業

配合三級警戒,嘉義市內的三个觀光夜市,對5/15停業到今。自治會也希望7/12過後,有機會開店做生意,市政府今仔日嘛派人到現場會勘討論。

夜市自治會代表佮市府人員討論防疫規定。嘉義市三大觀光夜市佮店頭,希望7月12微解封,會當符合防疫規定,重新開始營業。

嘉義市文化路攤商協會理事長陳家霖表示,「路口攏愛派人佇遐管制,這个經費開起來可能愛二三十萬。」

文化路店家講,「採取就是社交距離安全的用餐環境,然後閣有紮走的動線,攏有做防疫的規劃。」

夜市仔做生理的擔仔、店家,為著微解封嘛開始做準備,表示應該愛有的設備佮規定攏會配合,毋過針對夜市出入口管制的部份,自治會嘛希望市政府會當鬥相共。

文化路店頭講,「阮有隔枋共人客in隔開,入來就是酒精清毒、磅體溫按呢。」

文化路攤商表示,「出入口遮濟條,人數差不多愛偌濟,阮下晡會和市政府逐家來討論。」

嘉義市建設處表示,配合中央的指示,出入口佮擔仔的實聯制,喙罨、面罩、食物崁蓋,社交距離等等的要求,攏愛落實,會針對自治會交的防疫管制措施切結書佮計畫來評估,儘量輔導擔商佮店頭會當符合營業的防疫規定。
 

九合一選戰解析

相關新聞