畫銅人來教臺語講身體外觀 醫師刊文引討論

高雄長庚病院，有一位復健科醫師李炎諭，捷佇面冊頂頭，講解生活中的醫學智識，最近伊閣貼出一篇「定定聽著，復健的台語」，反映真好。李醫師用趣味的銅人，說明身體各部位的台語案怎叫。伊講以前台語無輾轉，是因為定定有阿公阿媽看診，臺語煞愈講愈好勢，嘛體認到學母語是誠重要。

佇病院巡房的時陣，共患者檢查、講話攏用台語，對李炎諭醫師來講無困難，最近他閣兼做老師佇網路教逐家身體部位的骨頭台語怎麼講，想袂到真濟人鬥揤讚分享。

就是這篇復健台語的圖文，因為銅人姿勢誠特別，嘛誠趣味，這陣已經有千外人分享，有人講欲提來教囡仔，另外一篇，教人搝腰、焐燒等等的復健方法，圖嘛是伊家己畫的，李炎諭愛佇FB分享復健智識，其實十年前他拄做醫生的時陣，干焦會曉簡單的台語。

到底是佗位痠痛，有時差一个音，就差真濟，尤其復健科的病人，六成以上攏是長輩，所以治療師多數攏會曉講台語。

這陣真濟少年醫生和治療師，台語袂輾轉，李炎諭分享學台語的撇步就是敢講，病人同事攏是伊的老師。