南投環保局改良潘桶 望推動潘水回收利用

目前，南投縣環保局每一工回收著縣內的潘水就有20噸。今為著欲減少回收的無閒，佮對環境所產生的影響，縣府今嘛研究出改良的潘水桶，予民眾踮厝內，就會當直接用潘落去做堆肥，才閣提來種菜，確實是一兼二顧。

共泡茶泡了無愛置的茶葉、猶閣有食tshun的果子，囥入去這台廚餘處理機，經過溫風乾燥、生物分解、殺菌了後，成做肥料。這種市面上就買會著，會使囥惦厝的廚餘機，利便也通予減輕廚餘對環境造成的負擔。

除了便的廚餘處理機，這陣縣政府當咧研發閣較環保的廚餘桶。共大跤藍色的塑膠潘桶四周圍挖空，用水管種菜蔬，民眾只要共潘倒入去桶仔內，噴一寡分解用的菌，崁蓋予發酵三禮拜，才閣照比例透水，予潘內底的有機物分解，就會使澆菜，變作植物生長的養分。

南投縣環保局表示，環保隊逐工收轉來的潘，就有20噸，這陣若順利研發出改良式的廚餘處理桶，未來民眾就會使佇徛家附近，較空曠的所在，用廚餘種菜蔬，沃肥閣兼顧環保。