新莊辦"台語動詞"課程 用互動圖卡幫助學習

講師若用捒車來解說"捒"這个動詞，若用互動式的圖卡來幫助囡仔學習，這个課程和一般的台語繪本故事活動無仝，有特別用互動式的台語教材，建立囡仔對生活上動詞感受，講師也表示，融合互動教材會當提升囡仔五感，對學習真有幫助。

台語課程講師 楊玫蕙：「伊目睭看、喙去講、手去振動，伊按呢就會變做一个五感體驗，就是五个物件(感官)，對伊身體連結的記持較有幫贊。」


課程當中除了看老師操作互動式圖卡來學各種動詞，囡仔家長也同齊做圖卡，毋但閣較了解實體動作的方向、使用情境，現場家長也表示，這款圖卡予學習變甲誠活潑，而且圖卡頂懸的字較少圖大，觀察落來囡仔較願意學。

家長：「較活潑、較趣味，囡仔咧學會較自然學。」

家長：「因為(圖卡)字較少，囡仔較學會起來、較會學。」

互動式教材發行人表示，教材發行大約伊冬，目前有一寡幼兒園、拄欲教囡仔台語的爸母有使用這套教材，反應攏袂䆀，按算今年8月左右會出版第二套互動式教材，到時也希望通結合APP陪囡仔學習台語。

《台語嘛會通》互動式教材發行人 洪子桂：「阮這馬嘛咧設計第二套《台語嘛會通》互動式學習組，8月的時陣嘛有《台語嘛會通》APP，希望予台語陪囡仔做伙大漢。」

另外講師也表示，伊家己佇國校仔教台語四冬，也觀察著目前學校教材，攏是以文字為主，伊強調圖卡、互動式教具是教學真重要的一部份，會當予學習效果加倍閣較有效率，也表示誠希望未來通有閣較濟台語互動式教材引入學校，打造豐富的台語學習環境。