「經濟學人」看咱朝野局勢 講拄好合中國的意

英國媒體「經濟學人」指出，對舊年立法院通過《選罷法》、《財劃法》、《憲法訴訟法》三大爭議法案，到最近的總預算風波，攏引起朝野真濟爭議。臺灣當咧這款亂象，是拄好合中國北京當局的意。學者講，猶是希望透過理性溝通，來達成共識，和平解決爭議。

中研院法律研究所研究員蘇彥圖：「這遍(憲法訴訟法)的修法，基本上是進前攏無好好討論，無得著社會的共識，所以這款的修法，其實攏是對臺灣憲政的民主，一个誠大的傷害，逐家愛來想看覓講，欲按怎來做一个改善。」

親像舊年通過的憲法訴訟法修正，民進黨團23就第二擺提起暫時處分佮聲請釋憲，但是修正條文佇25生效，大法官煞是猶未做出裁定。這馬憲法法庭只有8位大法官，無到修正條文規定，10位大法官的戶橂，學者講，無論結果如何，裁定結果攏會真有爭議。

中研院法律研究所研究員蘇彥圖：「憲法法庭伊的權力，毋是干焦對憲法訴訟法來的，伊憲法本身嘛有予憲法法庭、大法官，有伊的權限，所以若是講法律的規定，予伊憲法的權力無法度來運作的時陣，憲法法庭就會當講，上重要的是憲法的權力愛會當實現，𪜶當然是會當講暫時無欲適用新的法律。」

經濟學人指出，美國新的川普政府拄上台，臺灣當欲向川普政府展現盟友的關係，煞予立法院凍結部分關鍵國防預算，對臺灣佮華府的關係是一種傷害；經濟學人也講著，朝野對立的這款亂象，也致使臺灣政府有無法度運作的可能性。