南瀛國際民俗藝術節 18國21團體表演交流

拍鑼挵鼓鬧猜猜，兼有弄獅表演，臺南和順國小頭改有外國團體來學校做交流，逐个囡仔拚勢共功夫展出來予眾人看，來自紐西蘭的原住民看甲歡頭喜面噗仔兼贊聲，in閣實際落去體驗臺灣在地的藝陣文化。

臺南市和順國小囡仔講：「會踅鼓彼是戰鼓，啊若醒獅就是會跳椅條仔，阮是希望藉由這改戰鼓，予國外的貴賓來挑戰。」

臺南市和順國小校長陳良圖講：「利用這改的交流機會，予囡仔會當了解國際理解佮多元文化，這是一改足好足成功的交流活動。」

紐西蘭神龍舞團這回來校園參觀，IN嘛演出當地傳統的舞蹈佮歌曲，通予囡仔看著in佇戰爭是按呢去嚇驚敵人。這改來臺南主要因為南瀛國際民俗藝術節十月初五起鼓，攏總18國21組團體來參與，文化局嘛安排IN到各地頭行踏，兼做巡迴演出，欲予逐家閣較深入來認捌無仝國家的文化。

Taniwha ventures團長 Jack Cani講：「佇臺南的體驗是非常好的，有一寡團員嘛是頭一擺來臺灣，佇遮參逐家有足濟文化的交流，是非常難得的體驗。有一寡人可能會想厝，毋過目前為止佇臺灣攏過甲足歡喜。」

臺南市文化局長謝仕淵表示：「民俗藝術節毋干焦是，一个國外的團隊帶來精彩的表演之外，嘛希望這个文化交流，會當透過參訪等等的方式，來達到按呢的目的。」

因為疫情影響，致使藝術節閬六冬才閣舉辦，活動為期9工，鄉親毋免出國就會當欣賞各國的民俗藝術。文化局也期待未來會當參閣較濟國家合作，鬥陣推捒地方文化。