彰化車鼓陣藝師施朝養10/1別世 食到93歲
發布時間：
更新時間：
彰化縣傳統表演藝術「車鼓陣」保存者──施朝養，佇這个（10）月初1過往，食到93歲。伊佇1983年開始投入社區營造，傳授車鼓陣的技藝。文化部嘛會頒發旌揚狀，感念施朝養藝師佇車鼓陣這項無形文化資產的付出佮成就。（新聞標題、導言及內文皆為臺語文）
（整則資料畫面）
彰化縣傳統表演藝術、車鼓陣保存者──施朝養藝師，佇這个（10）月初一過身，食到93歲，伊自細漢就綴老爸學車鼓陣，表演功夫十全，生動活潑的唱曲、押韻趣味的歌詞內容，誠有觀眾的戲緣，逐家攏認這位──兩撇喙鬚的，只要施朝養出場，台跤就有笑聲。
施朝養的後生 施瑞南：「阮去臺北做，有一擺做神明的場，伊（施朝養）干焦mài-kù攑起來講爾，規个噗仔聲熱熱叫。伊（施朝養）咧講話足緊的，閣有押音啥物的，逐家聽了攏足佮意的。」
施朝養的新婦 蔡碧珠：「因為做這車鼓，頭先生理真好，一攤閣過一攤。阮是綴阿爸做，阿爸佮意這種（車鼓陣），所以就一直做、一直做，飼這个家庭。」
車鼓陣除了弄車鼓，重要的是小戲的表演，施朝養藝師有法度家己編戲家己演，活戲功夫嘛真厲害，伊佇1983年開始投入社區營造，傳授車鼓陣技藝，佇1988年，成立彰化和美雅溝才藝車鼓陣，佮後生、新婦全台灣行透透，四界表演，嘛真注心車鼓陣的傳承。
台灣傳統技藝推廣協會理事長 楊玉如：「對囡仔，教怹tshia̍uh-á啦，教怹跤步手路這个過程，其實阿公佮囡仔講一寡仔話，我感覺共90幾歲，繼續做車鼓陣這个精神，已經不知不覺，傳予囡仔矣。」
傳統技藝推廣協會理事長表示，施朝養藝師佮車鼓陣結緣一世人，伊總是滿面笑容，就親像車鼓陣的精神，歡頭喜面，用笑聲面對人生、共快樂帶予觀眾。
記者 楊舒晴 彰化報導
唐嘉良/編輯
