「尤里卡」入圍濟國影展 用煙腸探討死亡、性命

主角拉著一捾煙腸，走跳佇咧無仝款的時空中，這是台灣少年動畫導演徐啟倫的作品「尤里卡」，入圍臺灣、美國、日本、荷蘭濟濟無仝國家的影展，佇國際舞台有誠好的表現，透過煙腸來比論做平行宇宙，探討死亡佮性命，導演講，這是伊經歷過媽媽破病了後，對性命新的理解，透過創作行出悲傷，將這个作品獻予媽媽。

尤里卡導演徐啟倫，「我開始欲做畢業製作的時陣，厝裡母親破病，彼時陣是我第一改感受著，死亡就佇我身邊，這个作品對我來講，已經毋但是一个，干焦欲表現我的技術，表現我的能力的作品，伊顛倒是一个會當，安搭我的一个方式。」

「尤里卡」是徐啟倫佇台灣科技大學設計系的畢業作品，校內指導老師蕭勝文嘛是動畫創作者，佇大學教冊已經6冬，伊認為徐啟倫的作品特別的所在是伊靠一个人的力量，獨立完成所有的環節，非常認真去研究無仝的技術佮科技。

台科大設計系老師蕭勝文，「阮上課教的動畫技術，有2D佮3D，啟倫主要專注佇3D動畫，3D動畫的主要特點是講，伊技術非常密集，但是阮會希望學生以個人的方式，獨立完成動畫內面所有的環節。」

老師嘛講，這馬的台灣少年動畫創作者對事物攏有真幼路的觀察，予IN的作品會當佇國際上受著關注。徐啟倫畢業了後也佇臺灣成立家己的工作室，伊講，伊目前是拍算將臺灣當做伊的創作基地，為臺灣的動畫產業出一份力。