「Tâigí FLOW生活節」 鼓勵講母語、代代傳落去(涉己新聞)

(涉己新聞)
紙風車劇團演出台語舞台劇，台跤的大人囡仔看了笑咍咍，周邊也有台語文相關的市集通踅。這是文化部舉辦的tâi-gí flow生活節，濟濟大人囡仔攏來參與。

家長李小姐講：「伊(囡仔)轉來厝伊也有家己講(台語)喔，伊字看無、但是伊攏會家己背起來，唸予我聽按呢，自細漢就教，其實是上囡仔是吸收上濟的。」

現場主持人：「逐家攏來講台語，出發囉」

欲傳承母語，囡仔是關鍵。佇現場，文化部、公視臺語台、也參兩个民間兒少電視台，簽兒少節目台語主流化共同合作意向書，透過電視節目，予囡仔有閣較濟接觸台語的機會。

文化部長史哲表示：「這馬所有的電視台，攏有法度雙聲道、三聲道，著無？全世界的OTT，十幾種語言攏咧講矣，咱有法度予咱的囡仔的節目，本土愛增加，但是外國的節目，若佇臺灣放送、播送的時陣，嘛愛有好的台語配音。」
公視臺語台台長呂東熹表示：「未來會先按bàng-gà配音、合作，閣進一步會做節目的合作，初期就是講咱對配音開始，包括台語指導、包括台文翻譯，會當予伊較媠氣咧，這是未來第一階段的合作。」

公視臺語台表示，目前臺語台有台語配音版本的派對咖孔明、間諜扮公伙仔，攏引起各界真大的關注；未來參兩个民間電視台，會對外來節目配音台語開始，落尾發展到共同製作台語兒少節目等等，做陣推捒台語。