嘉義科學園區動土 88公頃、供5700个工作機會

行政院長陳建仁22這工，落南來到嘉義縣參加嘉義科學園區的動土典禮，南科管理局佇報告時指出，透過農業科技、智慧健康佮無人機產業的帶動，會帶來5700个工作機會，年產值有380億。

行政院長 陳建仁：「對核定到開始動土愛一年三個月，較早攏是動土好勢、水電攏好勢才閣來進駐廠商，這馬是廠商佮動土的時陣同齊入來，咱這个時陣發展就會較緊，時間嘛會較緊。」

嘉義縣長 翁章梁：「有一寡仔廠商有建廠的需求，一定會先共誠濟車路或者是需要的公共建設起好，然後規个科學園區完成了後就連鞭投入生產。」

嘉義縣經濟發展處表示，嘉義縣科學園區88公頃的範圍當中，產業用地佔40外公頃，內底閣有抾水池、實驗中學的建設，目前已經有十外間廠商有簽合作協議欲來進駐。

嘉義縣政府經發處長 江振瑋：「其實我知影閣有誠濟廠商想欲來進駐，目前嘛閣咧等相關工程進行到一个程度了後，會陸續來進駐。」

有進駐的廠商就表示，進前的工廠佇中部，想欲擴大規模煞揣無所在，嘉義縣科學園區上北落南攏誠方便，而且當咧發展農業科技、智慧健康佮無人機產業，攏誠符合IN的需求，所以對嘉義縣的科學園區誠有信心。