國中課本講"土豆"是馬鈴薯 中國用詞引爭議
郭柏均 張育睿 / 臺北報導
發布時間：
更新時間：
康軒出版社的自然科學課本，寫華文的「土豆」就是馬鈴薯，因為這是中國用語，引起濟濟討論；康軒出版社發聲明回應，課本編排是為著予學生了解，一種物件會使有幾若種用詞。(本篇新聞標題、內文、導言皆為臺文)
康軒國中一年仔下學期的自然課本，寫華語的「土豆」就是馬鈴薯，引起濟濟討論[[畫面提供：陳椒華委員辦公室out]]；看教育部的辭典，「土豆」確實有收馬鈴薯的意思，教育部長潘文忠也出面解釋。
教育部長 潘文忠：「(辭典)主要分做兩大類，一个就是適合佇中小學學生學習抑是教科書編定；另一个是較適合學術研究，出版社引用參考的是較屬於研究型的。」
這个事件也予人關心，部份臺灣人開始以「視頻」替代影片、「質量」替代品質等等，以中國用語替代臺灣慣勢用語。
學生 周先生：「這寡囡仔現此時接觸抖音等等的，其實攏知影遮的(用詞)，所以無必要按呢校正。」
學生 馬小姐：「有時陣講中國用語的時，是一个講笑詼的感覺，我是感覺真好笑。」
學生 何小姐：「猶是愛區別佗一寡是臺灣，佗一寡是中國的(用詞)。」
無仝學生對中國用語的接受程度攏無仝。學者表示，台灣佮中國攏捷使用中文，難免會受著影響，雖然兩爿的用詞一定互相受著影響，但是為著文化自體性，確實有需要區別。
臺師大臺文系主任 許慧如：「中文畢竟是這馬臺灣上普遍的語言，中文的用詞佮中國欲按怎區別，其實講是真困難，至少愛做到同中求異。教育部這馬有辭典，伊上無也踮辭典講予清楚，講這是中國的用詞。」
學者指出，語言是文化上重要的載體，若是臺語會使佇臺灣普遍，語言參中國有區別，自然較袂受著影響。但是這也牽涉臺語愛正常化，成做日常生活當中的語言，學者建議，政府會使對公家單位、自然提供多母語服務開始。
買湘瑩/編輯
2022杭州亞運 台灣百金之路
