臺灣傳統年節故事"燈猴" 時代變遷沓沓少人知

「逐家袂記得請燈猴食圓仔。啥物？竟然共我放袂記！」
台語老師用活潑的方式，向逐家講燈猴故事的由來，台跤大人囡仔攏真認真聽，古早時代年節故事上有名的就是燈猴，只是隨時代改變，已經愈來愈少人知影。
台語老師 蔡秋芬：「燈猴就是較早的人，替大家攑油燈的猴山仔，一个神明。到倚過年時逐家攏會挲圓仔，共圓仔黏佇欲感謝的物件頂懸，毋過有一冬，逐家袂記得共圓仔黏佇燈猴身軀頂，燈猴就受氣向玉皇大帝投，土地公就向逐家託夢講，明仔日會做大水，所以後來逐家就決定共好食物攏煮好，共錢攏pun完，後來就變做29暝，做伙食飯圍爐閣有硩年錢的由來」
除了燈猴的故事通好聽，現場嘛有過年台語遊戲會當耍，另外老師攢用絲仔印來做的紅包橐仔，予逐家動手做過年紅包。
家長：「燈猴故事阮攏毋知，才tshuā囡仔來參加活動了解咱的傳統。」
家長：「厝內序大攏講台語，才想予囡仔來聽台語故事，較捷練習台語。」
老師用台語講故事耍遊戲，除了會當提懸加深逐家對台語的興趣，嘛予逐家提早感受著過年氣氛。