新竹市府修復眷村建築 望保留文史.人情味

根據國防部統計，過去到今，陸海空軍、佇新竹市有誠濟設施、佮營區，致使眷村的數量嘛誠濟，計共47座。市政府這陣當咧修復佮活化遮的眷村建築，希望共眷村的歷史文化佮人情味、攏保留落來。
「徛直、行禮。」
規身軀過去國軍的穿插，來到眷村頭前翕相，親像轉去到過去。其實閣較早佇日本時代，新竹就是軍事重地，後來中華民國政府來台灣，陸海空等等各軍種有袂少部隊也佇遮設營區，所致計共有47座眷村嘛徛佇新竹市。
台灣軍事歷史重演協會理事 張義芳表示：「這種穿插配合較早逐家對眷村的回憶，其實閣較早進前老一輩的人攏知影遮的打扮，是台灣街路頂的一種印象。」
有60公尺懸大煙筒的日本海軍第六燃料廠，已經補強結構，按算2025年底修復完工。另外過去國軍重要幹部參眷屬蹛的將軍村，嘛當咧修整，未來希望開放予民眾使用。
新竹市文化局代理局長 李欣耀表示：「希望改造成開放的圖書資訊園區，佇遮的空間內底，毋但予民眾用無仝款的方式，學習智識，另外一方面，嘛會當參原本蹛佇眷村的人有較濟互動。」
台灣軍事歷史重演協會理事 張義芳表示：「時代的進步當然無法度改變，毋過政府應該會當去評估眷村的狀況，規畫保留較濟，予眷村的形象會使留落來。」
除了修復工程，文化局嘛舉辦演講、電影放送、眷村市集等等的活動，希望予眷村的歷史文化，會當保存落去。