國網中心辦動畫影展 揀12齣展出.望推在地作品
鄭雅文 林郁凱／臺北報導
發布時間：
更新時間：
目次
國家實驗研究院國家高速網路計算中心，今仔日佇臺灣動畫創作者基地，舉辦國網動畫影展，共過去11年以來，真濟國內優秀的動畫參賽作品，揀出12齣提出來展覽，望逐家熟似咱在地的動畫作品。
這是熊星人的動畫影片，主題是地球科學，這改國網動畫影展，將過去歷屆國內動畫人才的優秀作品提來展出。
策展人郭嘉真表示：「有三大主題，一个就是淨零減碳的訴求，另一个是淨心，愛看著內在的好，靜落來你會知影，你愛做啥物閣較好的代誌，另一个主題就是永續。」
為著培養國內動畫人才，國家實驗研究院的高速網路計算中心，自11冬前辦理動畫算圖競賽，自過去到今超過850隊4000人參賽，今年頭一改對歷屆優秀作品內底揀出代表性動畫展出，希望透過永續環境等等議題，譬如數位建模取代實景模型，予逐家了解動畫結合科學，這十幾年來也愈來愈有濟青年投入這个領域。
國家實驗研究院高速網路佮計算中心主任張朝亮表示：「阮用算圖農場，提供動畫創作者，主要的工具，就是用真緊的電腦，予伊做真濟代誌，按呢創作者會當聚集佇伊的想法，袂拄著真濟困難 像按怎予遮振動，傷困難煞放棄。」
國網中心表示，過去是用比賽來培養人才，有學生組也有社會組，這改自105齣動畫影片選12齣展出，望外界看著台灣自創動畫的能量佮遮的少年按怎創新。
專題｜改造地獄路 台灣行人路為何難行？
