台北市萬華區一間私立幼兒園，有家長指控講，一對三歲查某的雙生仔，才去讀一個多月，就予老師打55改，教育局表示，10月24進前，會完成調查，若是違法，上嚴重會撤銷執照。
對幼兒園監視器畫面看著，姓蔡的園長出力硩囡仔的頭，囡仔險險仔對椅仔跋落來。媽媽吳小姐看著畫面真心疼。吳小姐講，伊8月共雙生仔送到艋舺這間私立準公共化幼兒園，囡仔疑似佇一個外月的時間內，受著園長佮老師暴力對待55擺。
雙生仔的媽媽 吳小姐指出：「造成我的囡仔這馬對上課這件代誌，是非常驚惶，大漢的甚至佇新的學校上課的時，已經出現傷害家己的行為。做in的媽媽我真正非常自責，為啥物我會共我的囡仔送到這間學校」
吳小姐表示，家己的囡仔有發展較慢的狀況，園方對特殊囡仔無耐心，閣暴力對待。毋過園長表示，無暴力對待囡仔的代誌。
當事私立幼兒園 蔡園長掰會講：「毋是真的，毋是事實。阮是有教囡仔，無虐待in。等教育局裁判」
這間幼兒園閣予人查出超收，教育局表示，調查報告會佇10月24進前完成，若是事實，會使罰6萬到60萬，而且撤銷準公共化幼兒園的補助，上嚴重會使撤銷執照。
台北市教育局副局長 鄧進權表示：「目前針對超收的部份，阮是罰6000箍。針對不當管教的部份，阮等調查報告完成，確認了後，阮會另案閣開罰」
目前兩个疑似起跤動手的老師已經自願對幼兒園離職，但是姓蔡的園長猶踮咧幼兒園。參與記者會的律師表示，準公共化的幼兒園提政府的補助，法律上會使定位做行政助手，若是有家長對幼兒園提告，行政機關可能著負責賠償，這是現行法律的閬縫。
