頭批莫德納新配方疫苗 今日開放65歲以上注射
發布時間：
更新時間：
今仔日開始，六十五歲以上序大、蹛長照機構的人、免疫功能有問題等的民眾，會使注莫德納新配方的疫苗。後禮拜六開始，也會使注公費的流感疫苗，而且流行感冒和武漢肺炎的疫苗，會使仝一改注好勢，只要注佇無仝肢手就好。
次世代莫德納疫苗廿四開放六十五歲以上序大、長照機構的住民佮免疫功能出問題的民眾來注。目前臺北市的預約系統已經有欲兩萬人預約。
民眾講，「因為這个較新嘛，效果可能會較好。」
根據科學試驗，次世代疫苗比原本的疫苗對抗Omicron BA.4、BA.5加出1.68倍的保護力。臺北市衛生局呼籲民眾若符合資格就緊上網預約，嘛特別建議免疫不全的人到病院注。
臺北市衛生局專委紀玉秋表示，「有免疫不全的這个部分，阮建議伊愛到病院去注，理由是因為18歲以上免疫不全的人，伊有一寡仔註記，愛符合按呢的對象。」
除了COVID-19疫苗，逐年的公費流感疫苗嘛會佇十月初一開始注，聯合病院中興院區副院長吳岱穎表示，COVID-19疫苗佮流感疫苗是會使仝時注的。
聯合病院中興院區副院長吳岱穎講，「根據上新的資料顯示，譬如講倒爿流感、正爿COVID-19是無需要閬，會使仝一工注，會使仝一逝注，只是講愛注佇無仝肢的跤抑手頂懸，按呢的概念。」
最近天氣開始反寒，入秋了後就是流感的高峰期，臺北市衛生局呼籲民眾愛會記得注疫苗提升保護力。
