根據衛福部統計，2020年臺灣自閉症人口超過1萬6千人，這馬有科技公司發覺in佇工程方面，比別人較頂真。民間團體也呼籲政府愛放冗身障者保障名額，達到真正的工作平權。
對零件檢驗、校正影像、操作設備，自閉症員工佇科技公司做工程師，做三、五年，速度和品質袂輸資深員工。
工程師 黃建豪表示：「DTM遐的測試項目，予伺服器通過驗證，結果比較明確，OK就是OK、NG就是NG，部門的人、同事、主管人嘛攏真好」
企業公司SPA主任 姚怡萍指出：「實際上In真正來上班的時陣，in是較猛掠的，佇一般人攏已經測試一輪了後，伊閣去做檢測，伊猶會使發現問題」
遮的員工其實攏是自閉症患者，也有人叫in星兒，in雖罔佇社交、情緒、認知有欠缺，不過專注力和頂真程度，有的並一般人好幾若倍，有企業因為肯定in的特殊專長，8年前開始招in，成立特殊部門，這陣閣欲加招30位，繼續投入工程相關工課。不過民間團體認為，疫情下身障者人數的就業機會閣較少，呼籲政府放寬全國義務單位聘用身障者的名額。
中華民國自閉症總會理事長 陳惠玲表示：「大部份去予人接受的攏是肢體障礙，誠少講in看著in的優點，智能方面問題的囡仔，所接收著工課攏是類似一寡清潔的部份」
對勞動部的資料看舊年五月疫情爆發，全國義務單位身障者進用人數，八萬六千外人，其中自閉症人士有一千五百外人，占1.8%，到舊年底總聘用人數加兩千外人，自閉症加一百五十四人。勞動部表示若欲擴大招聘名額，愛閣凝聚社會共識、修法討論，目前會先共人猶無補足的單位補予齊。
