新讀報社活動慶文協百冬 招民眾論公眾議題

吳三連基金會員工鬥陣唱這條《台灣自治歌》，向文化啟蒙前輩者蔣渭水和蔡培火先生等人致意，也替公視台語台和吳三連基金會佇這三工欲辦的新讀報社3.0活動開幕，紀念文化協會成立百年。

吳三連臺灣史料基金會董事長，吳樹民表示：「到今目前其實咱台灣人，猶閣有子弟猶無去讀著，咱台灣主體意識的歷史，這若改變，我相信台灣主體意識，文化認同攏會改善。」

台灣文化協會1921年成立，初期辦會報、組讀報社、講習會、夏季學校、各種文化活動，留濟濟文化活種，建設台灣文化的啟蒙運動，這陣過一百冬，若看咱這陣的台灣科技發達、假消息滿四界，中國滲透的力頭也愈來愈大，未來咱欲按怎深化媒體辨識能力，也是這回新讀報社探討的重點。

吳三連臺灣史料基金會秘書長，戴寶村表示：「語言文化的背後其實是一種人權，透過台語台提供足好的，一寡新聞抑是戲劇，本來足多元的文化，嘛會當共伊發展出來。」

戴寶村肯定公視台語台佇保存文化多樣性和守護媒體公共價值的堅持，伊也強調台灣欲行向正常化，咱對文化、藝術和歷史就愛捌愈深，才通對台灣疼入心。