文史專家莊永明對年 紀念專輯出版遺稿史料

莊永明先生一世人注心研究台灣的地理和文化,今伊已經過身一年矣,文化部特別共伊的遺稿佮訪談,出冊和專輯送予家屬,向望伊為台灣文史奮鬥的精神,會當永遠保存落去。

已故台灣文史專家 莊永明捌演唱,啉啦,杯底毋通飼金魚,好漢破腹來相見,拚一步爽快嘛值錢。

唱起這條家己上佮意的「杯底毋通飼金魚」,莊永明捌講這塊歌是二二八以後,外省背景的作者為著促進族群融合所寫的歌。一生攏咧收集台灣史料的莊永明,如今已經離開咱一年矣。

文化部特別佇莊永明先生對年這工,佇伊的大稻埕故居,共在生前分析1920年台灣文化協會成立以來,啟蒙台灣文化主體意識的種種,計共2萬字的遺稿和伊的口述歷史影音記錄,出做套書和紀念專輯送予家屬收藏。

莊永明家屬講,伊正經是用伊的一生,來投入伊的興趣,這个興趣背後是有一个理想,伊的關懷咧支持的。
文化部長 李永得表示,莊老師講的,活就該如此,對世界愛感恩、對人愛惜情、對事愛懷舊,我想這是台灣藝術史內底,一段足重要的一段篇章。

莊永明一生攏注心咧研究台灣的地理和文化,出過的冊,像「台灣第一」、「台灣紀事」、「台北老街」等等計共50外本。今年嘛是台灣文化協會成立一百冬,伊戇工的精神和對台灣土地的熱愛,會佇這塊紀念專輯永遠留存。


 

相關新聞

專題|全台敬老金大調查