市面成長配方奶粉糖加傷濟 立委呼籲食藥署標明

市面上有誠濟針對一歲以上幼囡仔的牛奶粉,號做:成長配方。今仔日就有立委、和醫師召開記者會,表示真濟家長、根本就無清楚產品的內容,可能會予囡仔、食傷濟的糖份,也呼籲食藥署、著參考美國,規定廠商、愛表示、這內面糖有外濟。

真濟幼囡仔一歲以後攏閣咧啉牛奶,市面上閣有真濟強調成長配方的產品,宣稱對一歲以上囡仔的營養吸收誠有幫助,但是立委陳秀寶佮營養師、小兒科醫師今仔日佇記者會指出,這馬的成長配方產品,並毋是特殊營養品,也無算是六大類食物中的牛奶製品,家長其實毋是足了解內底的含糖量、牛奶量。
 
董氏基金會食品營養中心主任許惠玉:「伊添加這个物件是有番麥糖漿,甜的,精製糖,閣有這个甘蔗糖,閣有番麥糖漿固形物,這頭前幾項,是毋是就類似含糖飲料的概念。」

牛奶罐仔頂懸雖然有標示糖份,毋過到底是添加的、抑是天然的,其實看袂出來。營養師表示,囡仔若捷啉,可能食著過量的添加糖,呼籲食藥署應該愛比照美國實施標示添加糖的新規定。小兒科主任也講,其實一歲以上的囡仔主要的營養,應該愛食天然食物,訓練咬佮哺食才著
 
博仁綜合醫院小兒科主任毛心潔:「逐加會當理解食愛哺愛吞,伊其實是一寡,伊其實是一个囡仔成長,幼囡仔成長的過程,毋過咱若攏跳過,這个哺的過程,有的囡仔可能會干焦想欲啉無愛食。」

食藥署表示,這馬成長配方的產品攏規範佇一般食品,牛奶量超過50%才會當叫做牛奶粉,家長咧選的時愛予真,6月會召集專家開食品安全營養會議,無排除參照美國的作法,規定成長配方等等的相關產品,標示添加糖的成份。

全台敬老金大調查

相關新聞