嘉義推捒母語文化

嘉義城隍廟邊仔的東市場對1914年開始使用，內底有真濟擔頭攏誠有歷史。嘉義母語文化教育學會、配合地方商圈，娶、外國老師、家長佮囡仔，做伙行入市場內底，學課本以外的、生活台語。

嘉義母語文化教育學會總幹事張至宏：「籠床包仔嘛有人講包仔囝，因為細仔粒仔，包仔囝。」

家長佮囡仔佇城隍廟埕聽母語學會的紹介，除了有嘉義城隍廟的歷史故事，閣tshuā in入去東市場內底，學課本以外的母語。

嘉義精忠國小校長楊勛凱：「一个文化欲流傳落，其實故事是足重要的，佇遮一條延伸出來的故事，會予囡仔，包括咱家己聽著了後，咱就永遠攏會記得。」

學生家長鄭先生：「細漢到這馬完全毋捌來過遮，嘛毋知影有遮爾濟的歷史，尤其拄仔城隍廟遐的故事，真正足精采。」

為著欲推捒嘉義在地的文化歷史，嘉義市母語文化教育學會配合創育單位，舉辦母語的文化導覽活動，除了開放予學生佮家長報名，學校外國籍的老師嘛攏有興趣來參加。

民族國小外國籍教師Jason Stuart：「阮會當佇遮踅踅，看著真濟好食的菜，in嘛有紹介台文講的意思。

嘉義母語文化教育學會理事長林佳慧：「像講咱的城隍爺廟，咱東市場的百年老店，咱一寡做這米食，遮的在地店頭，其實in攏有足濟咱的在地精神，這號在地精神，一定愛予遮的囡仔，咱遮保存文化的人，做伙來閣共鼓勵，做伙來保存。」

母語學會表示，市場佮宗教是生活文化內底，誠重要的元素，透過遮的活動，囡仔佮家長會當做伙認捌在地的歷史，嘛順紲學習傳統社會使用的台灣語言。