真理臺文館換鎖惹風波 解拆張良澤文學貢獻路
發布時間：
更新時間：
來看前一站仔，真理大學臺文館，換鎖風波的退休教授-張良澤。伊少年的時陣、是按怎對文學有興趣，到尾仔行向做研究，閣成立臺灣頭一个臺文系，這一路行來的甘甜苦澀，咱做伙來看。
一句我來整理，張良澤前前後後用十外冬的時間，完成鍾理和作家全集，嘛成做台灣頭一个促使台灣作家全集問世的人物，毋但予台灣本土作家有完整的面模，對後輩的學習嘛有真大的幫贊。
一篇大西瓜的故事，講出台灣半世紀前的生活模樣，作家張良澤對國校仔五年就開始寫作，初中時佮意看武俠小說，讀台南師範的時陣開始接觸世界文學，佇一遍的畢業旅遊拜訪台灣作家文心，文心送張良澤一本冊，伊的寫作重心開始轉變。
高中彼一年的畢業旅行，張良澤因為文心，注意著台灣所發生的大小事，開始創作台灣鄉土內容的小說，作品大部份攏刊佇聯合報的專刊，專刊也收集濟濟台灣作家。有一日張良澤佇專刊看著鍾理和過往的消息，透過安排和鍾理和的某囝見面，這遍見面嘛是張良澤對寫作轉向收集文獻的關鍵。
張良澤用一世人的時間，整理濟位台灣作家一世人的心血。伊對創作，整理收集文學資料，猶閣創辦台灣頭一个台灣文學系，一路行來，張良澤猶繼續咧為台灣文學拍拚，這陣閣提出老人文學的概念以及文學園區的夢想，向望台灣文學會當行入生活。
