那彈吉他那唱台語歌，28歲的張庭漪用台語文來創作
張庭漪本身愛唱歌愛創作，一冬前開始學台文書寫，嘛佮歌詞結合。伊佇舊年參加某基金會舉辦的一項以古典詩詞創作現代歌謠的比賽，佇幾若位參賽者內底得著第三名，嘛是唯一用台語創作的選手。
抒情的風格，予人聽起-來感覺微微仔心酸，張庭漪共晚唐詩人李商隱的詩鬥入來歌詞內底。伊講彼个時代的古音佮台語蓋sio-siāng，嘛認為用台語來唱，才通共內底的押韻、平仄唱出來。講著為啥物開始踏入台語文的歌曲創作，上主要是發覺家己對這个語言的能力漸漸流失。
張庭漪自細漢參阿媽講台語，大漢了後才知影台語這塊有真深的學問，這馬伊繼續創作，嘛綴社區大學的老師咧學台語文，伊講，做任何代誌只要有心就會當成功。
