望皂壁結合在地.莫顛倒破壞景觀 新北今定規範

佇牆頂畫圖、創作，佇眷村、農村已經時行一站仔，嘛佇真濟所在造成觀光熱潮，毋過畫的主題佮畫佇啥物所在、可能也真要緊。若畫佇人的徛家，引起人的無歡喜、也是會產生糾紛。新北市政府特別針對景觀彩繪，訂出標準，最近就會向各單位公告。

壁面畫的是孫悟空陪伴唐三藏取經的故事，毋過煞畫佇民眾曝衫仔褲的巷仔內，也有的彩繪牆頭前停滿機車，予人看了感覺無蓋四序。新北市政府就最近打算針對景觀彩繪研議實施基準，希望美化城市景觀的本意莫變調。

市府最近就會公告相關的基準，未來若是公務預算補助的彩繪牆，愛先改善當地的環境。另外主題也愛配搭當地的產物抑是文化。也有學者認為，彩繪毋是想欲畫啥就畫啥，愛結合當地的特色才有意義。

學者也講，過去彩繪眷村誠時行，各地社區相爭模仿bôo-hóng，毋過佇熱潮jia̍t-tiâu退去了後，隨出現壁面按怎維護等等的問題。也有文化界人士佇面冊講著前一站仔，雲林虎尾的眷村去予人烏白亂皂的代誌，點出藝術抑是鑿目，有時只是一線之隔。