藝術家用管仔創裝置藝術 表現布農月亮文化
發布時間：
更新時間：
南投縣信義鄉地利村的遊客服務中心門跤口，這站有設一幅藝術品，號名做「尋鄉」，也就是走揣故鄉。抑地方目前也咧推動，用「馬告」這款芳料，生產芳水，毋才會「服務中心」內面，閣有另外一項展覽品，叫做「循芳」，內外兩款藝術品，號名誠倚音，真趣味。
行倚信義鄉地利村的遊客服務中心，遠遠就看著月娘浮上山頭，斟酌共看，竟然是用塑膠罐仔鬥起來的月娘，山頭閣是用廢柴設計的裝置藝術，無疑悟看起來煞有一款美感。
Bunun古早的傳說有講著，天頂本底有兩粒日頭，規年迵天直直曝，無暗暝，無落雨，族人生活是真艱苦。有一工，1个族人誤會日頭曝死伊後生，就共其中一粒日頭射著傷，著傷的日頭失去一爿的光線，tsűn變做月娘。毋過也因為這層誤會，族人和月娘約束，講以後攏著佇月圓時舉辦祭典。這个藝術創作就是展現出Bunun對月娘敬重的文化。
南投的部落最近當咧發展一款「馬告芳水」，遊客中心內底，就有一座號做「循芳」的作品，和外口的「尋鄉」藝術品，有華語倚音的趣味。這也是向望遊客來到遮，會當體會著地方的創意和活力。
