112冬南靖糖廠列歷史建築 地方促文化傳承

已經超過100年的嘉義水上南靖糖廠，今年8月予嘉義縣政府登錄做歷史建築。長期推動南靖地區文史調查的生活美學協會，邀請糖廠的退休員工，共逐家紹介糖廠的歷史。

共囡仔紹介佇糖廠做工課演變出來的俗語，予序細了解在地特殊的文化。佇咧嘉義縣水上鄉的南靖糖廠，到今已經有112冬的歷史，今年8月南靖糖廠的倉庫建築，正式登錄成做歷史建築。

協會配合社區佮學校，舉辦文史通學的活動，學校的囡仔嘛配合展出in調查糖廠文化的成果。社區表示，活動予囡仔實際體驗糖廠的過去，嘛通增加in對在地文化的了解。

現場的活動予囡仔齧甘蔗汁，炒烏糖，猶有糖廠火車的紹介，這馬倉庫也登錄成做嘉義縣的歷史建築，社區內底退休的員工表示，希望未來會用透過縣府的資源，修整閣較濟的建築物，予南靖製糖的在地歷史，愈來愈完整。