嘉義公園11/2起禁止排擔仔 先勸導才取締

超過100年的嘉義公園，市政府也宣佈欲整修。而且對11/2開始，公園袂使排擔，透早已經有警察咧趕人。目前是先用勸導的，若準無效，就會開罰單。

早起時仔的嘉義公園，真濟序大會到遮來運動。公園入口的所在，有一寡攤販 (thuann-huàn) 佇遮賣農產品，來運動的序大欲轉去厝進前，嘛會順紲買一寡菜。但是今仔日開始，嘉義市政府欲依公園管理自治條例，要求遮的攤販要離開公園。

嘉義市政府進前才宣布欲開2500萬，修整嘉義公園的一寡設備佮環境，而且要求遮的攤販11月2號開始袂用閣佇遮排擔，早時仔市政府人員佮警方嘛來到現場，要求攤販離開。

有民眾支持市府的做法，嘛有民眾同情攤販。市政府表示，雖然遮的擔仔對蹛附近的序大真方便，但是按照嘉義市公園管理自治條例，公園內底就是袂用有商業行為，會閣思考看欲按怎輔導遮的攤販，予in揣著合法排擔仔的所在。