高中生收集萬年溪資料 線頂展現活歷史

屏東高中有三个一年仔的學生真有心，用屏東市萬年溪做主題，收集老相片、衛星地圖和相關的資料，整理出萬年溪的歷史，做伙來了解。

點開這个號做「"屏"命之河 延續萬年新溪望」的網頁，屏東市萬年溪對上早1904年的景象，就盡在眼前，毋但有舊相片，就連衛星雲圖、水彩圖、歷史影相，真濟項素材攏敆佇這个網站，設計者是屏東高中才一年仔的學生。

為著展現萬年溪的演變，宋政軒、陳亮宇和顏銓億三个學生對收集圖像資料、文獻、舊相片 拍影片訪問居民、畫圖、設計網頁，鬥陣合作，整理出萬年溪的歷史，也呈現現此時萬年溪所面臨的污染狀況。

宋政軒、陳亮宇和顏銓億費心神走揣故鄉河川的故事， 這陣這个網站也佇第六屆全國高中職Story Map校園故事地圖競賽，受著濟濟人注目，得著冠軍，成功共無仝時代、無仝面貌的萬年溪紀錄起來，成做是線頂活歷史。