彰化縣府共文化部申請經費 望修復十宜樓

兩百冬前，彰化鹿港真繁華，當年佇十宜樓經營慶昌號的陳家，見證這段歷史。彰化縣政府佇民國90年共十宜樓登錄做歷史建築，經過20年，總算爭取著4500萬修復，按算明年十月完工開放。

有人歕鼓吹，有人下弦仔，往過惦遮，彰化鹿港鎮十宜樓，是地方士紳和文人定來的所在，不過因為十宜樓的歷史已經超過兩百年，門窗、壁面、樓梯，攏舊仔，彰化縣政府向文化部申請經費，希望修復這棟歷史建築。

早期這間徛佇這間厝的人家姓陳，過去陳家就惦遮經商，開商行，共糖、米、油賣去金門、廈門和漳州，平常時陳家也會邀請有社會地位的人來遮「彈琴、行棋、作詩、啉酒、畫圖、插花、看月娘、賭博、食薰、泡茶」，做遮十項代誌，所以號做十宜樓。

彰化縣政府估計明年十月進前，十宜樓就會修復完成，到時民眾去到鹿港九曲巷仔內的金盛巷路段，就會使入去參觀鹿港過去的風華故事。