台語版耶誕歌 "聖誕老阿伯"傳唱20年到今

(畫面已有歌詞)

番仔火人跳台語聖誕歌，這條歌號做「聖誕老阿伯」，聽起來真有過節的氣氛，因為網路的關係，佇短影音平台真濟人揤讚。但是你敢知影？這條歌已經創作20冬矣，連這个bàng-gà嘛是20冬前做的。

歌曲創作者 王金選
這條歌是20年前我本來就有咧寫囡仔歌，拄好南部有一間真平公司，伊咧做台語的教材看西洋的聖誕歌改台語版的好無


王金選老師講，這个歌詞是伊20年前改寫的，是寫來做台語課本的教材，予小朋友落去唱，無想講這馬佇網路頂有真濟人咧流傳，予伊真歡喜、嘛真意外。

歌曲創作者 王金選
較早若有人傳予我的時陣，閣問看我有聽過這首無我攏歹勢講這首是我寫的，我就干焦寫講有聽過按呢爾

囡仔佇臺灣過聖誕節，氣氛真重要，有國小的老師，逐冬除了會放台語版本的聖誕歌以外，閣會用羅馬拼音教學生寫卡片，過一个臺版的聖誕節。

國小台語老師 楊玫蕙
除了王金選老師的聖誕老阿伯這條歌我會教欲按怎唸，、按怎唱我嘛會予囡仔做手工比論講這欉是聖誕樹，嘛會予囡仔用台語寫聖誕節的卡片也有尪仔冊也有糖仔佮番麥實在有夠濟


王金選老師講，看著囡仔會當那唱歌、那學台語，是伊一直以來的夢想，因為伊較早細漢蹛佇台中的山區，無啥物娛樂、聽歌唱歌是伊上珍貴的記持，這20幾年來，伊也已經創作600外條的台語囡仔歌，目前伊也當咧計畫，出過年過節相關的囡仔歌，來陪伴囡仔大漢。

(畫面已有歌詞)

記者鄭亞宣 莊浚佑臺北報導