幼兒園用茉莉花寫台語歌 保留在地文化記持
加入公視會員，
按讚收藏你關注的報導
發布時間：
更新時間：
佇板橋浮洲仔過去上出名的就是「茉莉花茶」。雖然做茶的產業已經消失，毋過茉莉花佇當地猶是真濟、真芳。新北市大觀幼兒園，為著欲予囡仔知影茉莉花的故事，老師和囡仔用茉莉花來寫台語歌，保留在地文化記持。（新聞標題、導言及內文皆為台語文）
「茉莉花開白閣芳，風若吹來滿街巷。」
這首台語歌的旋律，逐家應該真熟似。這首台語歌是對囡仔歌《小天星》改編來的。新北市大觀幼兒園佇新北市板橋浮洲仔，幼稚園用茉莉花做主題，老師和囡仔做伙添台語歌詞。
新北市大觀非營利幼兒園園長 林芷涵：「一寡會曉講台語的阿公佮阿媽，願意佮囡仔來講台語，甚至是咱的老師嘛是攏開始有學台語的語言。咱較會曉唱的像小天星，閣有遮的歌曲較捷聽的，阮共台語的歌詞透入去。」
園長講板橋浮洲仔過去上出名的就是，茉莉花茶。今年tshuā囡仔佇社區行踏的時，一陣囡仔去予茉莉花的芳味吸引，所以學校決定tshuā囡仔共茉莉花的記持揣轉來。
這幅茉莉花的圖，就是幼兒園學生和臺灣藝術大學的學生鬥陣畫的。
臺藝大美術系學生 盧彥丰：「足趣味的就是，囡仔伊是咱叫伊按怎畫，但是伊一定袂按怎畫，一定會照家己的意思畫，所以咱愛替伊收尾。」
除了畫圖、唱台語歌，學校也重新佇校園種茉莉花，希望囡仔佇花芳中看見土地，感受文化的力量。
記者 鄭亞宣 林郁凱 新北報導
唐嘉良/編輯
