捒台語計畫 後龍圖書館課程台語比例煞干焦1%

為著欲加強台語的傳承佮使用，2024年文化部的「培育台語家庭計畫」起鼓，毋過也出現一寡狀況，像頂日仔桃園市文化局倩布袋戲團演出，予民眾批評欠缺台語意識和台語比例傷低，最近苗栗後龍鎮圖書館也予民眾指出，咧講故事培訓的課程，台語比例干焦1%，民眾表示誠失望，嘛講這毋是頭一改，捌共圖書館反映過嘛是無改善。

民眾 邱蕾蕾：「阮參加過的是台語戲劇營，伊是訂50％，老師會當講到95％；台語故事的部份伊是訂60％，實際上就是全華語，就是按呢的落差。」

目前苗栗縣咧做台語家庭計畫的主管單位是文觀局，怹表示針對活動無夠周至的部份，未來會照文化部的規定來落實。

苗栗縣文化觀光局客家事務科長 湯惠琴：「其實就是文化部按怎規定，阮就按怎做啊。後日仔舉辦這款語言相關課程的時，師資、課程的安排，閣有語言使用比例阮會閣較謹慎。」

文化部回應講，今年9月有新的公告，針對「國家語言數位資源網」頂的活動，台語比例愛寫明而且上無愛有60%，若是有領補助，煞無合規定，文化部會先輔導，若無改善，補助會扣錢，閣列入以後的補助審查參考，無領補助嘛著受監督。有台語團體表示，推廣台語袂當因為驚人聽無就毋去要求，若無永遠無法度創造台語環境。

李江却台語文教基金會執行長 陳豐惠：「這種煩惱咱攏會當理解，但是問題就是咱就是愛去突破這个獨尊華語、全華語的這種氛圍。未來不管是啥物款的演出，啥物款的活動，會當落實正面的台語形象佮較完整的台語比例。」

台語團體嘛建議，文化部通做一份手冊和指引，加強提醒欲執行台語課程、活動的單位，嘛通予濟濟有心欲捒台語的人，閣較了解按怎做較是台語家庭期待的活動內容。

記者 呂尚儒 林郁凱 臺北報導