臺灣史前博物館展覽 呈現早期文化「拍樹做衫」

先共樹皮較粗的所在削落來，然後共規塊樹皮掀起來，用槌仔沓沓仔仔摃，真緊就會當變做一塊布。專門咧做樹皮衫的藝術家講，這著愛用一工的時間落去摃，才會當摃出一領ﰶ仔 。

纖維藝術家 陳淑燕:「外口的樹皮你共伊削掉，然後內底就較白色，白色的纖維就是真正咱欲做衫的布彼个樹皮啦，然後咱才用槌仔共伊的纖維，槌甲鬆去然後伊才會變較闊」

藝術家指出，這種樹仔號做鹿仔樹，早期原住民用伊的葉仔來飼鹿仔，因為樹皮的纖維真耐用，會當提來做衫、做布料，用水洗也袂歹去，毋過因為手工複雜，這馬已經漸漸仔失傳。為著欲保留臺灣樹皮衫的文化，臺灣史前博物館欲舉辦「打樹成衣」的特展，展示早期原住民用樹皮做衫的傳統。

臺灣史前文化博物館副研究員 張至善:「佇民國48年的時陣，差不多就已經真少矣，基本上只有長輩的記持才看過，這馬咧做復振的主要是對都蘭開始，然後全臺灣開始攏陸續有一寡族群，有咧做這款的代誌」

博物館表示，特展辦到明年3月有半年的時間，嘛希望未來會當透過藝術家的創作，加入染色、設計的元素，變做皮包、裝置藝術等等，予這項珍貴的文化繼續傳承。