聽無廣播驚錯失避難時機 部落望有族語版本

光復鄉的人家厝，無閒咧摒爛塗糜，居民講想起崩山湖彼工，猶是心驚驚。回想災害發生進前，雖然當地人攏講有聽著廣播，但是有人聽無清楚內容，也有人毋知伊咧講啥。

當地居民：「就聽袂著，毋知影咧講啥物物件，真緊就過去矣，應該是用華語吧。」

花蓮光復鄉民代表 鄭萬正：「（警察車）就是講華語佮台語兩種，講這馬縣政府已經有預警，講溢流準備欲流落來矣。」

花蓮光復鄉，有蹛漢人也有原住民，代誌發生彼工，廣播愛民眾撤離的有警察車也有村長辦公室，當地的原住民青年認為，因為遮序大較濟，愛用母語廣播，才會當真正傳達訊息。

阿陶莫部落青年會長 孫志文：「這爿攏是阿美族的，所以阮會先用華語講，然後閣講阿美族語，所以阮遮無人受困抑是受傷。」

台語台記者 鄭亞宣：「當時佇大馬村的村長，就是用這粒放送頭，愛民眾趕緊撤離；毋過考慮著當地的序大，可能聽無華語，所以也有用阿美族語，愛民眾趕緊撤離。」

民眾認爲若是面對災難，居民無法度知影廣播內容，可能會影響避難。希望花蓮縣府，也愛提供阿美族語的廣播。對此，花蓮縣府也特別澄清，廣播有建立SOP，內底包含愛依照當地民眾的語言習慣來放送。

花蓮縣政府新聞科科長 李冠霆：「針對當地的語言和習慣來進行放送，阮目前採取的方式，攏是華語，以及當地習慣的語言來做傳播。」

縣府也表示，無論是村長廣播、警察或者是消防放送，攏要求照當地的母語來做通知，未來也會要求落實，確實做好傳達正確的消息予民眾。

記者 鄭亞宣 許猛捷 花蓮報導