鹿港行踏活動 認捌在地文化、學習台文書寫

一陣人咧踅傳統糕餅店，有草仔粿、發粿佮紅圓，原本就是用台語發音的食物，閣來去金紙店，介紹拜拜時會用的各種金紙，彰化鹿港有民間團體，舉辦行踏活動，欲予民眾熟似市場的台語文化

民眾：「像拜拜這兩个字，自本應該就是台語嘛，咱會講大拜拜。拜拜（華語）聽起來就是拜拜，台語毋是一種附屬華語的物件，怹是本底就存在的。」

𤆬路人 李宗學：「透過這个活動一方面是鼓勵店家，會使繼續用台語來共遮的顧客來介紹。用台語其實保存足濟，較早遮的物件的用法，嘛會使共文化佮語言，會使繼續傳落去。」

除了𤆬民眾去糕餅店、金紙店，熟似市場買賣的台語講法，主辦單位嘛規畫用書法寫台文字的活動，毋但欲鼓勵逐家加講台語，嘛希望推廣台語其實有字的這件代誌。

主辦單位 張安儂：「一个語言欲延續落去，毋是干焦聽干焦講，足重要的，咱漸漸仔愛共台語的字揣轉來，臺灣這塊土地的母語才會使傳落去。」

民眾：「我家己是做設計的，佮文化是較有關係的。語言的系統，嘛共（寫）做文章，抑是講嘛共書寫落來，文字一定是必要的。」

主辦單位表示，來參加活動的人，大部份台語攏會曉聽、會曉講，但是對台文字就真生份，但是語言的傳承，除了聽佮講，更加要緊是愛有文字系統的支持，才會當予語言世代傳承。

記者 楊舒晴 彰化報導