正式台語老師缺開無濟 學者：愛增加上課時數

台頂老師參學生咧討論「臺灣有啥物好所在」，上課氣氛真心適。這位是臺南後甲國中的專任台語老師，對教學支援人員一路拍拚，考牢正式老師，為母語復振盡一份心。毋過，這陣猶有真濟人參加台語師資培訓，結果政府開正式台語老師的缺，開無夠濟，有寡人厭氣，落尾只好轉去別途發展。

國立成功大學台語師資培訓班結業生穆小姐講：「有心欲復振咱本土的語言，其實是愛閣較積極，阮當然嘛會有期待。」

臺南市後甲國中台語專任老師林月娥講：「真期待咱教育單位，會當為咱師資培訓出來的老師，會當加開一寡台語缺，予遮的老師已經有教學的專業，會當奉獻佇教學的現場，嘛對咱的學生囡仔有正面的幫贊。」

根據成大台文系教授統計，對2022年，六都中等學校台語專任老師開缺的狀況，新北、臺北沓沓仔咧增加，顛倒高雄、臺南，明明講臺語比例上懸，煞無啥缺。教授認為，應該愛提懸名額，進一步提升台語教學的成效。臺南市教育局回應，目前正式教師有提著臺灣台語中高級認證的，國中佮國小加起來有1073人，若教學支援人員嘛有369个，師資是有夠的。

國立成功大學台文系教授蔣為文講：「若會當加增加台語專門師資的缺，按呢是上好的，閣包含咱佇學校內底台語課的教學時數愛增加，上無一禮拜愛三節，呔會使講攏獨尊佇中國話。」

臺南市教育局課程發展科長王靖雯講：「已經咧進行規个教師缺的盤點，缺的數量愛等外縣市老師調動了後，規个數量才會當較正確，按算愛佇五月底左右(公告)。」

雖然教育部有規範，對117學年度，公立中學24班以上、公立高中22班以上的學校，上少攏愛有一个正式台語老師。毋過學界建議，毋干焦是增加老師，嘛應該愛提懸本土語的上課時間。