史博館桌仔耍特展 趣味呈現無仝時代面貌

導覽員：「所以就會有一句俗語叫做『驢十二無走』，就是驢仔行了12（步）等於無行的意思。」

導覽員解說這个清朝的桌仔耍──「葫蘆問」，頂懸有47種民間故事的吉祥圖案，若是佇驢仔的位置撚骰仔撚著12點，行到另外一隻驢仔遐，按照規定著愛倒轉來原本彼隻驢仔的所在。除了清朝的桌仔耍，閣有逐家的共同記持「大富翁」，這是臺灣歷史博物館的桌仔耍特展，臺灣歷史博物館表示，希望透過展出臺灣社會無仝時期的桌仔耍，予民眾了解無仝時代的文化背景佮發展。

國立臺灣歷史博物館長 張隆志：「希望逐家透過這个展覽，毋管是歷史抑是地理抑是動物，抑是一寡拄仔委員有介紹過的，一寡升官圖、一寡智識，攏會當對這个展覽有一寡新的學習。」

臺灣歷史博物館表示，對2011年開館到今已經收藏大約15萬件的典藏，親像清朝的「升官圖」桌仔耍、佇臺灣南部誠捷咧耍的12生相牌等等這寡典藏，攏通看著各時代的文化特色、社會價值觀。

文化部主任秘書 林宏義：「娛樂兼顧教育意義，這个部份，用博物館的展覽，博物館的展覽內底，所出來的這个文化意義，予咱這个親子之間會當來了解咱的文化，這个部份實在誠重要。」

文化部表示，這个桌仔耍特展，毋但會當看著台灣社會的生活樣態，用趣味的方式tshuā逐家行入博物館，了解珍貴的歷史和文化記持，誠有教育意義。目前通去文化部藝廊參觀桌仔耍特展，對今年6月開始佇臺南的臺灣歷史博物館，會使看著珍貴的桌仔耍「實體原件」展出，到時陣會有體驗活動，希望tshuā民眾了解臺灣桌仔耍的百年變遷。

記者 張佳倪 莊浚佑 新北報導