天主教學校拍破傳統 萬聖節變裝、學生展創意

臺南德光中學突破天主教的傳統，頭一擺舉辦萬聖節變裝比賽，鼓勵學生發揮創意。另外，in嘛結合校內的台語課程，教學生相關的台語詞彙，用生活議題唌學生開喙講台語。

有人扮做埃及人疤咧參台跤學生互動，嘛有人妝娗做包公、道士的模樣不止成，各班捒代表裝做各種無仝造型來參加變裝比賽，毋但比創意、嘛比趣味。這擺萬聖節變裝是德光中學班聯會向學校爭取的，主要因為佇天主教文化內底，無特別過這个節日，這回in拍破傳統，以多元發展的角度，頭改辦這款應景的活動。

德光中學變妝學生講：「因為感覺包公足緣投，面烏烏特別有威嚴。」而德光中學班聯會會長洪淑研則講：「愈來愈大漢就沒機會參加像這款活動，嘛無機會去扮裝，就想講敢會使有這个機會，予全校做伙來參與萬聖節。」對此，德光中學校長楊惠娜表示：「上蓋印象深刻的是扮這款嗽血鬼，按呢行路有夠成的啦，學校本來是就足多元的發展，予學生會使展現這个部份，會使看著in的創作參自信。」

妝扮比賽予學生實際體驗西洋鬼仔節的文化，另外，台語老師嘛用母語紹介萬聖節的故事，兼教in相關台語詞。西方的萬聖節若像咱舊曆七月仝款，台語老師講，外國有欶血鬼的傳說，咱本土嘛有真出名的妖魔鬼怪的故事。

德光中學台語老師康順添表示：「上課的時陣我攏會共囡仔講，除了英國起源的萬聖節，咱臺灣嘛有足濟……比論講有虎姑婆、林投姐，我上課嘛攏講予囡仔知。in無形中下課的時陣，轉去厝攏會參in的序大講台語。」台語老師講，節慶參母語教育做結合，對生活中予學生接觸台語，予in嘛沓沓練習開喙，認捌咱家己本土的文化。