台語文當興 出版社辦朗讀節用台語講萬項代

「哇，是足濟節車廂的火車，身軀有足濟無仝的圖，足媠的。」

手提繪本，用台語唸故事，囡仔攏真斟酌聽。這是民間出版社舉辦的「台文朗讀節」活動，主辦單位講，因為發見這幾年台文出版愈來愈興，看著台文出版的發展性，就結合市集、展覽、講座，舉辦全台語的「台文朗讀節」。

聯經出版總編輯涂豐恩：「這馬真正是愈來愈濟(台文出版)，有囡仔人的冊、有大人的冊、有文學的翻譯，攏有，繪本是上濟的，因為逐家想講愛予囡仔人來讀(台語文)。」

「你咧看氣象報告，其實伊上重要的資料，是對佗位來，是對太空。」

予人號做「火箭阿伯」的國家太空中心主任—吳宗信，當咧用台語講太空科技，吳宗信講，台語通講萬事萬項，伊鼓勵逐家佇各種領域，攏通試咧用台語講現代事，共台語多元化，拍破逐家對台語的刻板印象。

國家太空中心主任吳宗信：「語言其實伊愛有適當的環境，佮資源來好好仔發展，所以佇現代足濟科技，尤其科技足濟方面的發展、資訊的發展，伊有足濟新的技術，閣一寡名詞出現，所以你若國家有一定的資源來提供，我想伊的語詞，詞庫會愈來愈濟。」

台文朗讀節連辦三工、對拜六到拜一，講座除了台語講太空，也有音樂創作、出版編輯、世界文學、歷史思想等等，箍各種領域的專家，做陣來用台語分享，展現台語文當咧多元發展。