10/16世界糧食日 臺灣捐2萬外噸米助18國家
發布時間：
更新時間：
今仔日10/16是「世界糧食日」，這是聯合國大會所訂的主題日，自1981年施行到今已經43冬，希望國際社會做伙來關注糧食的議題。尤其這幾年極端氣候、戰爭等等的因素，全世界有超過7億的百姓枵腹肚，咱國農糧署嘛招民間團體做伙捐出2萬外噸的白米，也有長期咧做國際援助的NGO團體召開論壇，向望予臺灣民眾了解國際上枵飢、佮囡仔營養不良的問題。（此則新聞標題、導言、內文皆為臺語文。）
今仔日10/16是「世界糧食日」，這幾年極端氣候、戰爭等等的因素，全世界有超過7億的百姓咧枵腹肚，咱國農糧署嘛招民間團體做伙捐出2萬外噸的白米，也有長期咧做國際援助的NGO團體召開論壇，希望予臺灣民眾了解國際上枵飢佮囡仔營養不良的問題。
這幾年因為極端氣候，致使真濟國家有出現高溫佮洘旱，影響著農產的種作和收成。除了天氣因素，像中南美洲的海地，因為當地治安和經濟無好，根據海地和聯合國組織9月底發布的報告，指出海地有48%的人口、540萬人有枵腹肚的情形。
海地難民尤納爾表示：「逐工我攏著拍拚，為囡仔提供一寡食物，通常食物干焦有夠一人份食，著愛分予十个人食，阮無法度為所有的人提供充足的營養，這干焦夠予阮袂餓死。」
致使糧食出現危機的主要原因，包括氣候、散赤、戰爭等等，根據聯合國糧食和農業組織（FAO）的調查，2023年全世界有超過7億的百姓枵腹肚。10/16世界糧食日，有民間團體和農業部、外交部做伙捐米援助18个國家，嘛招專家學者開論壇，向望予臺灣民眾了解國際上枵飢佮囡仔營養不良的問題。
台灣好鄰居協會秘書長楊國正講：「臺灣過去也有一段時間是透過外援，不過咱現在農業技術真發達，阮希望把最新技術造就發展中國家，希望講提升它們的農業產量。」民間團體表示除了捐米，in佇51个國家攏有設服務據點，向望透過培力予當地百姓有能力改善家己的社區。抑若農糧署是表示，臺灣自2002年開始，逐年攏有捐公糧的計畫，今年攏總捐出2.2萬噸的白米。
農業部農糧署副署長黃昭興表示：「咱無欠米就會去共遮的公糧，利用這个機會去援助遐的較欠的所在，包括海地、宏都拉斯，攏是算較散赤、較欠米的所在。」農糧署表示希望透過國內公私部門的協助和國際互助的行動，來響應國際關心的糧食安全佮枵飢的議題。
記者 呂尚儒 莊浚佑 臺北報導
盧元媜/編輯
