黃土水注心臺灣藝術 台語畫本紹介伊故事

日本時代的臺灣藝術家黃土水，伊刻的「甘露水」佇舊年被指定做臺灣國寶，今年9/6甘露水頭改佇以國寶的身份咧日本展覽。黃土水是頭一位佇日本學美術的臺灣人，除了甘露水，水牛系列嘛是真有代表性的作品。為著欲予讀者通熟似伊和伊的創作，大塊文化出版台語繪本《寂寞的天才--黃土水》。

作者 黃郁欽講：「伊替(日本)皇室嘛做足濟物件，佇咧彼陣總督府總督嘛足欣賞伊，毋過伊無因為按呢，袂記得家己是臺灣人。伊佇咧創作的過程當中一直咧揣講，啥物物件會當代表臺灣，尾仔就是水牛。所以咱會當看著伊後期，足濟佮水牛相關的作品。」

黃土水1895年佇臺北艋舺出世，捌入選日本帝展4改，作者指出入選帝展對當時臺日的藝術家來講是真光榮的代誌，伊的成就也鼓勵顏水龍、陳澄波等人，去日本學美術。繪本的總編輯表示，向望透過這本繪本，帶動讀者對臺灣藝術家的興趣佮認捌。

大塊文化總編輯林怡君講：「咱其實對梵谷足熟，伊起痟割耳仔，我甚至去看過梵谷的墓兩改，你就會感覺為啥物顛倒咱對咱的前輩遮生份。我感覺透過做這个冊，嘛希望會當加一个管道，予無論大人讀者抑是囡仔讀者攏會使愈了解咱的前輩。」

為著欲予讀者對黃土水有愈深的了解，出版社猶閣設計報紙專刊，除了推薦相關冊單，嘛予作者分享做這个繪本的本心。作者表示黃土水這个繪本，是伊《日本時代臺灣人物》系列繪本的第二本，按算欲閣出三本，予逐家了解過去臺灣各領域出擢的人物。