第二屆語言發展會議起鼓 針對四大議題討論

國家語言發展會議，7/27佇咧臺北舉辦「臺灣台語北區論壇」。頭起先就來討論台語名稱的議題。學者提出聯合國地名標準化的原則，來呼籲政府應該愛用尊重語言族群的方式，來恢復台語的名稱。

台中教育大學台語系教授何信翰：「伊(漢城)正名做首爾，伊講我無愛閣做中國城，我欲做首爾伊自他稱改做自稱，聯合國的地名標準化建議會議，伊講地名攏有自稱佮他稱，但是伊一直攏建議使用自稱，就是你家己按怎叫你就用啥，你家己應該愛有號名權。」

何信翰指出河洛話是客家族群對台語的稱呼，閩南語是70年代國民黨政府硬捒的，伊認為強逼台語族群接受家己無佮意的名稱，這是違背國際人權公約的表現。另外，也有學者批評目前的雙語政策，予英語的資源濟過其他本國語言，應當用多語政策來取代，平等重視逐種語言。

台灣大學語言學研究所教授江文瑜：「有一工我開課我用台語。我會使邊仔攏走華語出來、抑是走英語出來，我欲予較濟學生來聽我的課，所以我相信咱的AI技術若會突破，咱未來咱鼓勵愈濟人用母語，咱邊仔攏有AI的字幕，我感覺這是一个會使規个政府去思考的問題。」

語發會議每一場分區論壇，攏會以語言意識、在地發展、教學現場和國家語言專責機構，四大議題來做討論，每一場結束攏有開放民眾提問。另外，原底第二場會辦佇花蓮，煞因為風颱影響著交通，文化部表示會閣另外公告時間。