「台語」名稱引爭議 台師大學者呼籲政府統一

針對「台語」這个語言的名稱，佇臺灣一直攏有無仝款的討論，有人主張愛叫台語、有人主張閩南語、嘛有人講是河洛話，咱嘛來聽民眾的實際看法。

民眾黃小姐，「(台語閣換一个名你會感覺怪怪無)會喔、會，我會感覺無習慣。」

民眾涂先生，「感覺是對這塊土地的感情按呢，是有人咧辯論講，是愛講閩南語抑是講台語，猶毋過我家己是較佮意講，我的母語是台語按呢。」

事實上這个討論，嘛對臺灣吵到法國。臺灣有一位咧法國開台語課的劉展岳老師分享講，今年四月，學校內底有設一堵語言壁，「台語」也出現佇內底，猶毋過伊講教學五年來，定會受著中國學者的質疑和挑戰，講「台語」為啥物毋叫「閩南語」。

法國國立東方語言佮文化學院教授劉展岳，「一部份欲用閩南語的人，伊就會想講你佇咧臺灣，恁教育部嘛是用這个詞，為啥物你無愛用這个詞，所以其實對阮來講，佇外口咧教咱臺灣語言的人，教咱歷史的人、文化的人，其實我足希望講咱臺灣會當，有一个較清楚的選擇。」

劉展岳認為用台語的名，毋但是咱的認同，嘛有標示咱臺灣主體性的意義。若根據2022年國家語言報告的調查來看，有7成外的民眾是使用台語這个名，後續行政院嘛捌發公文要求各部會，應當優先使用「臺灣台語」，毋過教育部到今煞猶咧用「閩南語」。臺師大臺文系的教授共同寫陳情書，希望政府以「臺灣台語」來稱呼，結果教育部猶是消極回應講無社會共識，予ﰀ感覺真失望。

臺灣師範大學台文系主任許慧如，「中文來臺灣進前，台語這个語言是臺灣80%，左右的人的母語，其他20%嘛大部份會曉講這个語言，因為台語就是共同語的角色，就是無仝語言的人之間溝通的語言，這个語言伊就是號做台語抑是臺灣話，但是這馬咱煞因為，這个政治的考慮，佇咧咱臺灣去予臺灣家己的人，要求咱袂當叫家己的名，這个問題我感覺，比咱咧國際袂當叫臺灣閣較嚴重。」

臺師大臺文系的系主任強調，台語的叫法佇臺灣早就已經有社會共識，甚至閣有文化部的調查報告做證明，呼籲教育部莫閣目睭瞌瞌，當做無看著，嘛希望閣來118年的新課綱做一回改起來，予國家語言發展的推動有一致性。