北埔正月十五油笐火 千人攑火把.照光秀巒山

濟濟民眾排規列，手攑竹管仔做的火把，一个共火過予後一个，逐家做伙行去秀巒山，規列的火把共北埔的街仔路點甲光光光。

民眾表示：「第一擺體驗感覺真趣味，逐家對這个活動攏真熱情。」

民眾表示：「感覺真特別，佇別位攏無辦法所體驗到的感覺。」

相傳佇1895年的北埔事件，日本殖民政府為著削弱在地人的反抗力量，佇當地開一條新的路，欲來斬斷北埔的龍脈。經過地理先開破，當地人發起攑火把接龍的行動，代表將火龍接轉來北埔。發展成後來逐年正月十五的油笐火活動。

新竹縣北埔鄉長莊明增表示：「所有的鄉親手攑油笐火，來到慈天宮相等，火點起來了後，才閣來去北埔老街的街仔路，佮秀巒山夜遊，用油笐火龍的概念，共龍脈接轉來。」

今年的油笐火節目，現場除了有趣味的活動，閣有好看的表演，目前報名人數已經超過3千人，欲來做伙體驗在地傳統風俗。