同性戀伴侶袂當佇臺灣人工生囝 民團呼籲修法

規桌頂的藥仔，攏是接受人工生殖所需要。林小姐佮伊的牽手想欲有囡仔，礙佇台灣干焦允准不孕夫妻做人工生殖手術，只好到柬埔寨做人工生殖手術；另一个同性家庭的何小姐是選擇到日本做手術，講著這段過去，就嚨喉滇。

女同志家長 林小姐：「我取卵了後轉來，六工就直接送急診抽出900cc的腹水，因為我去著著卵巢過度刺激症候群，這是我第一擺離死亡遐爾近。」

女同志家長 何小姐：「舊年有聽過不孕症的夫妻、台灣的異性戀不孕症夫妻，會使有人工生殖補助。講實的，補助我毋敢想，我唯一咧數想的，就是以後若是阮欲做試管嬰仔，會使佇咱家己的國家。」

林小姐表示，伊佇柬埔寨進行的手術，全部的費用差不多百外萬，何小姐佇日本接受兩擺的人工生殖手術，總共嘛愛200萬。若是到美國雖然一擺是30萬，但是加上交通居住等等費用，嘛愛100萬左右。比佇台灣做一擺17萬左右，實在是差真濟。

彩虹平權大平台執行長 呂欣潔：佇現有的人工生殖法內底，只要妻有子宮，包含女同志的配偶，其中一方的妻有子宮，其實伊就符合這馬人工生殖法的規範，伊無需要去做大幅度的修改。」

民間團體表示，目前干焦允許不孕症夫妻會使接受試管嬰兒手術，當咧佮立委推動修法，將女同性戀家庭嘛列入允准名單。國健署表示，因為正反意見真濟，猶閣咧尋求共識。男同性戀家庭的部份，民間團體表示因為牽涉代理孕母等等議題，影響層面閣較闊，猶閣咧參各界溝通。